ក្រុមហ៊ុនទូរស័ព្ទចល័តដុះដូចផ្សិតនៅមាតុភូមិដ៏តូចច្រឡឹងរបស់ខ្ញុំ! បើប្រៀបនឹងញាតិជិតខាងក្នុងតំបន់អាស៊ានឃើញថា ខ្មែរយើងដូចជាកុះករជាងគេក្នុងរឿងនេះ ។ រាប់ត្រួសៗទៅមាន ០៨ ក្រុមហ៊ុនឯណោះក្នុងពេលបច្ចុប្បន្ន (២០០៩) ដែលបានបម្រើសេវាទូរស័ព្ទចល័ត ឬ ទូរស័ព្ទដៃ នៅកម្ពុជា ។
ឃើញថាពិភពលោកកំពុងជួបវិបត្តិហិរញ្ញវត្ថុ តែនៅស្រុកខ្មែរទីផ្សារប្រព័ន្ទទូរស័ព្ទចល័ត ឬប្រព័ន្ធទូរគមនាគមកំពុងផ្លូកទឹកផ្លូកដីសម្បើមណាស់ ។ ជិះកាត់កន្លែងលក់ស៊ីមកាត ឃើញបិទស្លាកពេញហ្នឹង ស៊ីម១$ មានលុយ 2$ ស៊ីម២ ថ្លៃ 3$ មានតេអត់កំណត់… ។ល។ នេះប្រហែលជាសញ្ញាណមួយបង្ហាញប្រាប់ថា ការទំនាក់ទំនងនៅស្រុកខ្មែរ មានភាពប្រសើរជាងមុខខ្លាំងសម្បើម មានលក្ខណៈសម្បូរបែប ។ល។
កាលពីល្ងាចមិញខ្ញុំទៅញ៉ាំអីជាមួយពួកម៉ាក គេបបួលទៅមើលទិញលេខថ្មី ០៩០ … ទៅដល់អ្នកលក់មកបានយកលេខមកបង្ហាញឲ្យរើសទេ គាត់ថា “ទិញអត់រើសលេខ ស៊ីម១ ថ្លៃ ១$ មានលុយ ២$ អាចតេបានគ្រប់ប្រព័ន្ធក្នុងតម្លៃតែមួយ”
“ទិញលេខយកទៅប្រើ ទោះយ៉ាងណាឲ្យខ្ញុំសុំរើសបន្តិចបានទេ ចែ” ខ្ញុំតបទៅអ្នកលក់វិញ
អ្នកលក់ឆ្លើយមកវិញថា “រើសបានពូ! លេខរើសថ្លៃ ២$” …
“ចឹងក៏ចឹង…សុំមើលលេខបន្តិចមក” ខ្ញុំចង់មើលលេខវាម៉េចដែរ បំណាច់ទិញលេខមកប្រើសុំរើសបន្តិចហើយ …
“រើសធ្វើអីទេពូ! ក្រុមហ៊ុនថ្មីៗគេទិញស៊ីមតេចេញអស់លុយ កាច់ចោលហើយ!” អ្នកលក់គាត់បន្ថែមកមុនហុចតារាងលេខឲ្យខ្ញុំមើល
យកពាក្យសម្តីគាត់មកគិត “ទិញកាច់ចោល!” អូ! ស្រុកខ្មែរសម្បូរបែបដល់ថ្នាក់ហ្នឹងណ៎ មានតែអត្តសញ្ញាណប័ណ្ណមួយ ទិញលេខទូរស័ព្ទកាច់ចោល!ៗ! ! ចុងក្រោយខ្ញុំបានមកជាមួយស៊ីមពីរទុកគ្រាន់តេ ទិញ១$ តេបាន ២$ គ្រប់ប្រព័ន្ធតម្លៃតែមួយទៀត… ហេហេហេ ចាំអង្កាល “តេហើយអស់លុយកាច់ចោល!” ហេហេហេ
សាកល្បងរាប់ទាំងចាស់ទាំងថ្មី តាមលំដាប់លំដោយ ព្រមជាមួយមតិយោបល់ផ្ទាល់របស់ខ្ញុំចំពោះក្រុមហ៊ុនទូរស័ព្ទចល័តទាំងនោះ …
- ០១៨ (បច្ចុប្បន្ន ក្ស័យជីវ៉ាទៅហើយ) កាលពីមុន ខ្ញុំភ្លេចបាត់ទៅហើយថាឈ្មោះក្រុមហ៊ុនអីគេ តែចាំបានថាទូរស័ព្ទកាលណោះគេហៅថាស្មងគោ វាធំៗណាស់ ឈ្លោះគ្នាអីគេអាចយកវាទៅធ្វើជាអាវុធការពារខ្លួនបាន ហេហេហេ!
- ០១៧ (បច្ចុប្បន្ន ក្ស័យជីវ៉ាទៅហើយ) ឈ្មោះក្រុមហ៊ុនបើតាមខ្ញុំចាំមិនខុសគឺ Telstra ភាគហ៊ុនធំប្រហែលជាមកពីម៉ាឡេស៊ី ។
- ០១២ - Mobitel ខ្ញុំជឿថាអ្នកគ្រប់គ្នាស្គាល់គាត់ហ្នឹងច្បាស់ជាងគេ គាត់បានទទួលជោគជ័យជាងគេក្នុងអាជីពនេះដែរ ហើយគាត់កើបលុយក៏មិនស្ទើរដែរ តាំងតែពីគាត់ចេញដំបូងដូចជាមួយនាទីថ្លៃដល់ទៅ ៣៣ សេនអ៊ុយអេស ឯណោះ… ហើយឥឡូវគាត់ដូចជាមានសមាជិតក្បាលលេខច្រើនដូចជា (០១២, ០៩២, ០១៧, ។ល។ ដឹងមិនអស់ទេច្រើនពេកច្របល់គ្នាពេញតែហ្នឹង) ។
- ០១១ – Camshin ឬគេហៅឈ្មោះថ្មីថា M-fone គាត់ហ្នឹងមកជាមួយទូរស័ព្ទអចល័ត ឈ្មោះដំបូងគាត់ពេញៗគេហៅថា Cambodia Shinawatra បន្ទាប់មកក៏ Camshin កាលពីប៉ុន្មានឆ្នាំមុនគាត់បានសាកល្បងយកសេវា CDMA – 450 មកដែរតែមិនត្រូវបានទទួលការគាំទ្រទេ… បច្ចុប្បន្នភាពគាត់ហ្នឹងត្រូវបានគេហៅថា កំពូលក្រុមហ៊ុនថែមលុយ … ទីផ្សារគាត់នោះមិនបាច់និយាយទេ ដាក់ ៥ បាន ៥០ ក៏មានដែរ តែលក្ខណៈវែងដូចកន្ទុយខ្លែងអញ្ចឹង …. ញាតិសណ្តានគាត់មាន ០៩៩, ០៨៥ (បើខ្ញុំចាំមិនខុស ដូចជាមាន ០៨៩ មួយទៀត)
- ០១៥- ០១៦ Samart ឬ ក៏ក្រោយពីបាតុកម្មប្រឆាំងថៃឆ្នាំ ២០០១ មកគាត់ត្រូវបានគេហៅថា Hello និងបន្ទាប់ពីសេងភាគហ៊ុនធំឲ្យទៅក្រុមហ៊ុនម៉ាឡេស៊ីមក ឈ្មោះគាត់ហ្នឹងគឺ T A Telecome ហើយប្រើស្លាកសញ្ញា Hello លើប្រព័ន្ធទូរស័ព្ទ ។ វិរៈភាពរបស់គាត់ដែលគេគ្រប់គ្នាស្គាល់គឺ Freshies Boy & Girl ហ្នឹងឯង … តែឥឡូវត្រូវបានប្តូរទៅជា M-fone Freshies រៀបរយហើយ ។ សមាជិតថ្មីរបស់គាត់គឺ ០៨១ (បើតាមខ្ញុំចាំបានគាត់ហ្នឹងចេញមុន ០១១ ទៀតគឺប្រើ ប្រព័ន្ធដូច ០១៨ (ចាស់ដែលស្លាប់ហើយនោះ) ក្រោយមកទើបប្តូរមកជា GSM 900 និង 1800 វិញ)
- ០៩៨ – Star Cell ជាស្លាកសញ្ញាទូរស័ព្ទរបស់ក្រុមហ៊ុន Applifone Company Ltd. ចាប់ផ្តើមដំបូងគាត់ហ្នឹងធ្វើឲ្យកក្រើកមេឃស្រុកភ្នំពេញតាមរយៈការលក់ស៊ីមកាតតម្លៃថោក ដូចជា ៣ ឬ ៥ដុល្លារ ហើយនិយាយក្នុងប្រព័ន្ធដោយអត់គិតថ្លៃ និងប្រើអ៊ិនធើណិតក៏មិនគិតថ្លៃប្រហែលជា ២ ទៅ ៣ ខែដំបូង ។ ប៉ុន្តែក្រោយមក ឬពេលបច្ចុប្បន្នក្រុមហ៊ុនចេញក្រោយៗ គេដេញទីផ្សារគាត់យ៉ាងខ្លាំង ធ្វើឲ្យស្តាសែលនៅពេលនេះ ស្ងាត់ជ្រងំ បូកផ្សំនិងទីផ្សារដូចជាមិនសូវពូកែស្រាប់ផង (ដាក់ ៥$ តេបាន ៥០០នាទី… មានអីអស្ចារ្យ សួរដូចឆោត? របស់គេផ្សេង ៣$ តេបានមួយខែអត់កំណត់? មានអាតេអស់ស្ទះ ១០សេនមួយថ្ងៃ តេអត់កំណត់ ។ល។ អ្នកណាទៅប្រើរបស់គាត់បានប្លែក! … ហើយអ៊ិនធើណិតក៏អញ្ចឹងកាលពីមុន ៤០$ ប្រើមិនកំណត់ តែក្រោយមកបែបគាត់មិនសូវចំណេញ គាត់ឲ្យប្រើត្រឹម ៣ជី អញ្ចឹងទៅអតិថិជនប្រើច្រើន គេបោលក្ឌុងទៅរកកន្លែងដែលប្រសើរជាងសឹងអស់…) អនាគតពិបាកថា ព្រោះបើតាមតំបន់សេវាក៏តូចរបស់គាត់ ប្រហែលជាយ៉ាប់បន្តិចក្នុងការដើរទៅមុខក្នុងទីផ្សារប្រកួតប្រជែងខ្លាំងដូច្នេះ!
- ០១៣ ឬហៅថា Cube ឬ QB ជាស្លាកសញ្ញារបស់ទូរស័ព្ទរបស់ក្រុមហ៊ុន CADCOM ដែលចេញមកខ្លាំងក្លាសម្បើម ឬនិយាយថាចេញមកហ៊ឹកហ៊ាក់ផន់គេ ហើយអើណាស់គាត់ហ្នឹង គឺគាត់មានតែសេវា ៣ជី ដែលប្រភេទទូរស័ព្ទជាង ៥០% លើទីផ្សារមិនមាននៅឡើយ ។ គាត់មានប្រជាប្រិយភាពត្រង់ថា ៣ដុល្លារ តេមិនកំណត់ក្នុងប្រព័ន្ធ តែពេលយប់តេមិនចេញទេ! ព្រោះមនុស្សបុកគ្នាតេមិនសំចៃថ្មទូរស័ព្ទ ។ ពាក្យស្លោករបស់ក្រុមហ៊ុនគឺ ច្រើនជាងការនិយាយ … ហេហេហេ ដូចមិនអញ្ចឹងសោះ តន្ត្រីតាមតម្រូវការ អ៊ីនធើណិតតាមតម្រូវការ ស្អីហ្នឹងដូចមិនពិត ព្រោះគាត់គិតថ្លៃសឹងអីហ្នឹង ៣៥ ដុល្លាមួយខែ ប្រើបានតែ ១ជីកន្លះទេ! អ្នកណាៗក៏ស្រែក ប្រើមិនដឹងស្អីផងអស់បាត់! វាកាត់លុយឯងដូចព្យុះ ហេហេហេ ចុះវាលឿននោះ 3G ប្រុចៗអស់បាត់ទៅហើយ ១ជីកន្លះ…. ចំណុចខ្សោយមួយទៀតរបស់គាត់ហ្នឹងគឺ សេវាយ៉ាប់ណាស់ ក្នុងផ្ទះខ្ញុំអត់មានសេវាទេ ទាំងៗដែលផ្ទះខ្ញុំនៅចម្ងាយមិនឆ្ងាយពីទីស្នាក់ការធំគេប៉ុន្មានផង (បឹងត្របែក ខ្ញុំនៅទួលទំពូង) ឮថាបន្ថែមៗ តែមកដល់សព្វថ្ងៃជិតមួយឆ្នាំហើយ គ្មានឃើញអីប្រែប្រួលទេ គឺនៅយ៉ាប់ដដែល ។
- ០១៨ Excell ចាប់កំណើតជាថ្មីប្រហែលដើមឆ្នាំ ២០០៩ ក្រោមឈ្មោះថ្មី Excell (Future is Now) របស់ក្រុមហ៊ុន GT Telecom … គាត់ចាប់ផ្តើមដោយបច្ចេកវិទ្យាខុសពីក្រុមហ៊ុនផ្សេងទៀត គឺគាត់ប្រើប្រព័ន្ធ CDMA 2000 ដែលទូរស័ព្ទនៅលើទីផ្សារស្រុកខ្មែរ ៩៩.៩៩% មិនមានលក់ទេ ចង់ប្រើទាល់តែទិញរបស់ក្រុមហ៊ុន ដែលមានផ្តល់ជូនក្នុងតម្លៃ ថោក! តែសម្រាប់អ្នកប្រើប្រាស់ភាគច្រើន ដែលជាយុវវ័យលេងតាមស៊េរីទូរស័ព្ទ មិនសូវជាមានចំណាប់អារម្មន៍ ព្រោះលេងម៉ូតតាមចិត្តមិនបាន ហើយម្យ៉ាងសេវារបស់គាត់ មានតែនៅភ្នំពេញទេ ។ ឃើញក្រុមហ៊ុននេះប្រឹងស្វះស្វែងខាងសេវាអ៊ិនធើណិតជាង ព្រោះគាត់ម៉ៅប្រើម៉ាសេរី ៣០$ ក្នុងមួយខែសម្រាប់ល្បឿន 150 Kbps និង ១៥០$ ក្នុងមួយខែសម្រាប់ 2 Mbps .(ខ្ញុំជាអតិថិជនរបស់គាត់សព្វថ្ងៃនេះ)
- ០១០ និង ០៩៣- Smart Mobile hehehe កាលពីមុននាំគ្នានិយាយលេង កាលណាគេចេញអាលេខ ០១០ (ប្រៀបធៀបទៅហ្នឹង…គិតខ្លួនឯងចុះបាទ :p) ស្រាប់តែដើមខែ២ ឆ្នាំ២០០៩នេះមានចេញមកមែន ក្រោមស្លាកសញ្ញាទូរស័ព្ទ Smart Mobile ។ ឃើញថា ឆ្លាតមែន តែមិនមែនអតិថិជនទេ គឺក្រុមហ៊ុនគាត់ទៅវិញទេ កម្មវិធីគេមិនដឹងស្អីខ្លះទេ ស្តាប់ទៅឈឺក្បាល ចង់បានថែមនេះ ទាល់តែប្រើនោះ ។ល។ ស្តាប់ទៅស្តាប់មកគឺគាត់ឆ្លាតពេក ឃើញថាឱការដណ្តើមចំណែកក្នុងទីផ្សាររបស់គាត់មិនខុសពី ០៩៨ ទេ… ព្រោះតែភាពឆ្លាតវៃរបស់គាត់ … ឃើញមានចេញ កម្មវិធីថ្មី តែអស់ស្ទះស្អីគេហ្នឹង មួយថ្ងៃ ១០សេន គិតទៅមួយខែ ៣០០សេន ឬ ៣ដុល្លារ តែមិនកំណត់ … ហេហេហេ តើវាខុសពីឃ្យូបត្រង់ណាទៅ? ឆ្លាតម៉្លេះក្រុមហ៊ុននេះ បំបែកលេខឲ្យឃើញតូច តែខ្ញុំថាអ្នកប្រើប្រាស់សម័យនេះមិនល្ងង់ណាស់ណាទេ … Smart Mobile Company ហាហាហា
- ០៩៧ – Metfone ឬ មិត្តហ្វូន ជាក្រុមហ៊ុនមួយមកខ្លាំងហ្មង! គាត់មានប្រភពដើមពីប្រទេសជិតខាងយើង ឈ្មោះក្រុមហ៊ុនគាត់គឺ Veitel … តាមខ្ញុំដឹងបំណងរបស់គាត់ផ្តោតខ្លាំងទាំងទូរស័ព្ទដៃ លើតុ និង អ៊ិនធើណិត ព្រោះគាត់បានរាយបណ្តាញខ្សែរកាបអុបទិចពេញទឹកពេញដីយើងទៅហើយ ។ ជាការពង្រីកទីតាំងរបស់ក្រុមហ៊ុនមេនៅវៀតណាមដែលចង់ភ្ជាប់បណ្តាញកាបអុបទិចរបស់ខ្លួនទូទាំងតំបន់ឥណ្ឌូចិនតែម្តង! ខ្ញុំបានសាកល្បងប្រើប្រាស់ហើយ ទៅសៀមរាប កំពង់ចាម ។ល។ សេវាគាត់ពេលទឹកពេញដីមែន តាមប្រភពព័ត៌មានមិនច្បាស់ការថា គាត់បានដាក់បង្គោលអង់តែនៅស្រុកខ្មែរបាន ១៥០០ដើមហើយ ហើយគ្រោងនឹងតំឡើងឲ្យគ្រប់ ៣០០០ ដើមនៅដំណាច់ឆ្នាំក្រោយ ។ តាមស្ថានភាពការដាក់ទុន បើធ្វើការប្រៀបធៀបនឹងក្រុមហ៊ុនថ្មីៗផ្សេងៗទៀត ឃើញថាគាត់ហ្នឹងរឹងប៉ឺងគ្រាន់បើជាងគេ ។ ហើយគាត់ក៏មិនសូវ ប្រឹងទីផ្សារខ្លាំងដែរ ព្រោះគាត់អាងថាតំបន់សេវាគាត់ខ្លាំងជាងអ្នកថ្មីទាំងឡាយ តែបើប្រៀបជាមួយអ្នកចាស់ គាត់ខុសគេត្រង់ថា លេខគាត់មានដល់ទៅ ១០ខ្ទង់ ០៩៧ XXX XXXX ។
- ០៩០ – Beeline ជាក្រុមហ៊ុនធំមួយទៀត បើតាមការសង្កេតរស់ខ្ញុំ បន្ទាប់ពី ០៩៧ មកគឺមានគាត់នេះឯងតែខ្លាំងមិនណយទេ គាត់ចេញមកទាក់ទាញខ្លាំង កាច់គេបំបាក់ឯងទាំងអ្នកចាស់អ្នកថ្មី គឺតេទាំងក្រុង ទាំងក្រៅប្រព័ន្ធ តម្លៃតែមួយគឺ ៥សេន ។ ក្រុមហ៊ុននេះមានកំណើតមកពីប្រទេស រុស្សី តាមស្ថានភាពទុនរបស់គាត់មិនតូចតាចទេ ហើយតាមព័ត៌មានមិនច្បាស់ការ ឃើញថាគាត់កំពុងប្រឹងប្រែងតម្លើងបង្គោលអង់តែនពង្រីកតំបន់សេវាពេញទឹកពេញហ្នឹងដែរ ។
សុំរ៉ាយរ៉ាប់ត្រូសៗប៉ុណ្ណេះចុះ! មានខុសខ្វះទាស់អីបើមិត្តអ្នកអានបានឃើញជួយប្រាប់ខ្ញុំផង … ៚៚៚
vRYA on 
somada on 
សុភ័ក្ត្រ on 
Vy on 
3G ស្រុកយើង « KHMERLING on
រួចចុះ បងប្រើ ០៩០ ហ្នឹង មានប្រើអិនធឺណែតឥតគិតថ្លៃទេ? ប្អូនដូចជាស្ទាក់ស្ទើរ ចង់ទិញបន្តិច ចង់អត់បន្តិច។
ពិសិដ្ឋ! អត់មានទេប្អូន គិតពេញថ្លៃហ្មង!
ប្រាកដជាពុលមិនខានទេរឿងលេខទូរស័ព្ទនេះ
ខ្ញុំថាកំពុងតែពុលពេញហ្នឹងហើយ! ចាំទៅរកពីខាងមុខកន្លែងលក់ស៊ីមមកចែកគ្នាយើងនៅឆ្ងាយៗមើលលេង! ហេហេហេ
គិតទៅរីកចំរើនដូចផ្សិតមែន។ តែមិនដឹងថាផ្សិតណាអាចញ៉ាំបានខ្លះហើយផ្សិតណានឹងគ្រួក្នុងពេលឆាប់ៗនោះទេ។
បាទលោក C*H*A*N*R*O*R*U*N បន្តិចទៀតនឹងដឹងហើយ ….
សេដ្ឋកិច្ចទីផ្សារសេរីវាអញ្ចឹងឯង តែងតែមានការប្រកួតប្រជែងច្រើន ហេហេ
បាទបាទ! អនាគតអ្នកជំនាញខាងជំនួញ…
hahaha
សុំបន្ថែមព័ត៌មានមួយចំនួនដូចជា
- ០១៨ហ្នឹងពីមុនឈ្មោះវា Camtel (កុំច្រលំជាមួយ Camintel)
លឺមកថាកាលហ្នុងថៅកែក្រុមហ៊ុនគាត់ទទួលមរណៈភាពទៅ ក្រុមហ៊ុនក៍មរណភាពតាមគាត់ដែរ។ តាមខ្ញុំនៅចាំប្រព័ន្ធ និងទូរ Server វាមានទីតាំងនៅក្រសួងbប្រៃសណីយ៍ តែក្រោយពីដួលរលំភ្លាម(ប្រហែលឆ្នាំ ២០០៥ ឬ២០០៦) គេអត់រើទៅណាទេ ទុករហូតទាល់តែជាងពាក់កណ្ដាលឆ្នាំ២០០៨បានគេរើ។
- Telstra ជាភាគហ៊ុនធំរបស់អូស្រ្តាលីទេ មិនមែនម៉ាឡេស៊ីឡើយ Telstra/BigPond ឈ្មោះចាស់ផស់ក្រុមហ៊ុន Online ពីមុនហ្នឹងឯង។
- និយាយពី Hello វិញសរសេរឈ្មោះក្រុមហ៊ុនគេខុសហើយអាតោហៀ មិនមែន TA Telecom អីទេ គឺ TMIC= Telecom Malaysia International (Cambodia)
នេះគ្រាន់តែជាការដឹងត្រួសដ៍តិចតួចផស់អ្នកនៅតេលេខមប៉ុណ្ណោះ អូហ៍ប៊ិះភ្លេចទៅមិនមែនតែ ៨ក្រុមហ៊ុនហ្នឹងទេ នៅ២ក្រុមហ៊ុនទៀតដែល in the process…
និយាយពីរឿងទូរស័ព្ទដៃប្រទេសខ្មែរខ្ញុំស្អប់បំផុត ជាពិសេសក្រុមហ៊ុន 012 ព្រោះថាខ្ញុំប្រើវា ខ្ញុំដឹងច្បាស់ជាងគេ ។ តើមានប្រទេសណាដែលប្រើទូរស័ព្ទ
ឆ្កួត ៗ ដូចខ្មែរ ។ ទឹកប្រាក់មិនបានតេចេញចូលក៏អស់ យកខែជារយៈវេលា
ខ្ញុំសូមប្រាប់បន្តិច ប្រទេសដ៏ទៃ បើមិនបានតេចេញចូល ទឹកប្រាក់ដែលនៅ
ក្នុងទូរស៏ព្ទក៏វាមិនចេះអស់ដែរ ឧទាហរណ៏ថា ក្នុងទូរស័ព្ទមានទឹកប្រាក់ 50
ដល្លាក្នុងខែនេះតែអស់រយៈពេលវេលា យើងបញ្ចូលទឹកប្រាក់បន្ថែម 50 ទៀត
វាក៏ត្រូវមានទឹក 100 ដុល្លា ។ មិនចាំបាច់និយាយថាប្រទេសឆ្ងាយឯណា ប្រទេសថៃ បញ្ចូលប្រាក់ 20 បាត មានរយៈប្រើការមួយឆ្នាំ
ចុមនៅមាន២ទៀតកំពុងដំណើរការ! អូហូ! ឱ! ពិតជាច្រើនមែន!
ខ្មែរបុត្រា…អាឡូវហ្នឹងវាថោកក៏ពិតមែន តែពិបាកតេចេញណាស់ពេលយប់ ខ្ញុំតេម្តងៗខឹងសឹងតែបោកទូរស័ព្ទដៃចោលទេ នេះពិតជាគេហៅថា មានបរិមាណតែគ្មានគុណភាពមែន!
មកដល់ពេលនេះ នៅស្រុកយើងមានក្រុមហ៊ុនទូរស័ព្ទដែលមិនកាត់លុយនៅផុតកំណត់ខែហៅចេញឬនៅ ? ខ្ញុំក៏ជាម៉ូយរបស់ 012 ដែរ ឲ្យតែជិតផុតកំណត់ហៅចេញ ខំទៅញាត់លុយតាមលុយចាស់ បើមិនអញ្ចឹងគេកាត់ដាច់ គ្មានសលេ់ ។
ចំជាថោកមែន!!!
Pingback: 3G ស្រុកយើង « KHMERLING